لكل بنت روشه

الأحد أكتوبر 14, 2012 12:19 pm

السلام عليكم ورحمه الله وبركاته
انا هكلم كل بنت حجابها ستايل
وعالموضة
و روش !
ايوا متستغربوش انا بتكلم عن الحجاب !
للاسف احنا كل مانسمع كلمة ( متبرجة ) نتخيل على طول واحدة لابسة سكيني وبادي وضاربة شعرها في الخلاط ومش محجبة
مع ان بنات كتير بيبقوا محجبات ومتبرجات فيضيعوا حجابهم !
.
.
ياحبيبتي انتي اسمك محجبة .. يعني لازم تحجبي مفاتنك

يعني مينفعش اللبس الاوفر و الوانات داخلة في بعض ..
ولا خمسمية طرحة فوق بعض كأنك عاملة برج ..
ولا طرحة مخرمة وعلى اساس ان لونها من لون الشعر فمفيش حاجة هتبان ..
ولا البرفان اللي بتغرقي نفسك بيه وتقولي النظافة من الايمان ..
ولا الالوانات اللي بتبصغي وشك بيها قال ايه انا بحط حاجة خفيفة ومش باينة .. !

وممكن تخدعي بيه نفسك وتقولي : ربنا رب قلوب !
وممكن تخدعي بيه اي حد في الدنيا

لكن هتخدعي بيه ربنا ؟؟
ربنا اللي شايفك كل يوم وانتي بتنزلي بيه وتغضبيه وتفتني عباده ..
ربنا اللي مديكي الايدين والعينين وكل حاجة تخليكي تضبطي مكياجك وحجابك قبل ماتنزلي ..
ربنا اللي اداكي نعمة الصحة انك تقدري تتحركي اصلا وتنزلي من بيتك ..
ربنا اللي اداكي العقل اللي تفكري بيه وتميزي كل حاجة حواليكي وانتي جيتي وفكرتي : ازاي ابقى حلوة واعجب اي حد يشوفني ..

فكري شوية بس وهتعرفي ان اللي اداكي كل الحاجات دي قادر ياخدها في لحظة واحدة
والمشكلة مش في انه ياخدها .. عشان مهما كان دي دنيا .. سنين محسوبة وكلنا الى زوال
المشكلة ان كل الحاجات دي هتطلعلك هناك .. في دنيتك الحقيقية .. دنيتك الخالدة .. في السنين اللي ملهاش نهاية

المشكلة لما تعرفي انك استحملتي الحر في عز الصيف وحاجات كتير عشان الحجاب وتروحي هناك وتكتشفي انك مكنتيش محجبة

المشكلة لما تتصدمي بحقيقة انك شلتي ذنوب ملهاش عدد عشان كنتي كل يوم تنزلي بالمنظر ده

المشكلة لما تعرفي ان ده يوم الحساب .. وخلاص مفيش توبة ولا غفران
.
منقول